इनेपालपत्र , ३९ पटक हेरिएको
लेटाङ, २ पुस । मोरङको लेटाङ नगरपालिका–३ नं. वडा कार्यालयले आज वडाका दुई प्राथमिक विद्यालयका विद्यार्थीहरूलाई न्यानो कपडा वितरण गरेको छ। कार्यक्रम अन्तर्गत कृष्ण प्राथमिक विद्यालयका १०५ जना र बिरनको आधारभूत प्राथमिक विद्यालयका ४५ जना विद्यार्थीलाई स्विटर प्रदान गरिएको हो।
वडा अध्यक्ष डम्बर बहादुर राईले आफ्नो मन्तव्यमा चिसो मौसममा विद्यार्थीहरूको स्वास्थ्य र शैक्षिक गतिविधिमा कुनै असर नपरोस् भन्ने उद्देश्यले न्यानो कपडा वितरण कार्यक्रम सञ्चालन गरिएको बताए। उनले भने, “हामीले शिक्षा र स्वास्थ्यलाई सँगै जोडेर अघि बढ्नुपर्छ भन्ने मान्यता राखेका छौँ। विद्यार्थीहरूलाई चिसोबाट जोगाउन यस किसिमको सहयोगले उनीहरूको पठनपाठनमा निरन्तरता दिन सहयोग पुर्याउने विश्वास छ।”
वडाले सधैँ सामुदायिक विद्यालयहरू र विद्यार्थीहरूको हितलाई प्राथमिकतामा राख्दै कार्यक्रम ल्याउँदै आएको उल्लेख गर्दै उनले आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरे। “बच्चाहरूको खुसी नै हाम्रो प्रयासको सफलता हो,” उनले थपे।
कार्यपालिका सदस्य अमिता राईले वडाले शिक्षा र विद्यार्थीहरूको हितलाई प्राथमिकतामा राखेको धारणा राखिन्।
वडा सदस्यहरू राम प्रसाद अधिकारी र नरेन्द्र पराजुलीले यस्तो सहयोगले विद्यार्थीहरूलाई थप प्रेरणा दिने विश्वास व्यक्त गरे।
प्रधानाध्यापक पूर्ण बहादुर श्रेष्ठले विद्यालय र विद्यार्थीहरूको तर्फबाट वडाप्रति आभार प्रकट गर्दै, यसले शिक्षामा सुधार ल्याउन सहयोग पुर्याउने उल्लेख गरे।
विद्यार्थीहरूले न्यानो कपडा पाएपछि खुसी व्यक्त गर्दै पढाइमा ध्यान दिन सहज हुने प्रतिक्रिया दिए। “हामीलाई चिसोमा पनि विद्यालय आउन सजिलो हुनेछ,” एक विद्यार्थीले भन्यो।
कार्यक्रमले विद्यार्थीहरूको उत्साह बढाएको भन्दै अभिभावकहरूले पनि वडालाई धन्यवाद व्यक्त गरेका छन्।
प्रकाशित मिति: २०२४-१२-१७ , समय : १४:४३:५४ , ४ दिन अगाडि