प्रशान्त निराैला , ८४ पटक हेरिएको
लेटाङ, २४ मंसिर । प्रथम लेटाङ क्रिकेट प्रतियोगिता आगामी पुस १ देखि ९ गतेसम्म लेटाङ नगरपालिका-५ स्थित बुद्ध रंगशालामा आयोजना हुने भएको छ। आयोजक समितिका अध्यक्ष मानवहादुर लिम्बु (एम्बी)ले आज आयोजित पत्रकार सम्मेलनमार्फत यसबारे जानकारी दिनुभयो।
प्रतियोगितामा मोरङ, झापा, सुनसरी, र मधेस प्रदेशका १२ टिमको सहभागिता रहनेछ। आयोजकका अनुसार प्रतियोगितालाई करिब ५ हजार दर्शकले प्रत्यक्ष रूपमा अवलोकन गर्ने अनुमान गरिएको छ।
प्रतियोगितामा प्रथम हुने टिमले नगद ५१ हजार रुपैयाँसहित मेडल र ट्रफी प्राप्त गर्नेछ भने दोस्रो हुने टिमले नगद ३१ हजार रुपैयाँसहित मेडल र ट्रफी प्राप्त गर्नेछ। साथै, उत्कृष्ट प्रदर्शन गर्ने खेलाडीहरूलाई प्रदान गर्न पाँच विधागत पुरस्कार पनि राखिएको छ।
प्रतियोगिताका मुख्य सहयोगी हाल युकेमा बसोबास गर्दै आउनुभएका लेटाङ-३ निवासी सन्तोष राई हुनुहुन्छ। प्रतियोगिताका प्रायोजकमा युरो पेन्ट्स, बेन्कार्डो, र ओम शिवम रहेका छन्।
मिडिया पार्टनरको रूपमा लेटाङ खबर, सामाजिक सञ्जाल पार्टनरको रूपमा ट्रोल लेटाङ, र फोटोग्राफी पार्टनरको रूपमा १०१ नेपाल रहनेछन्। प्रतियोगिता सहआयोजकका रूपमा लेटाङ जेसिज पनि सहभागी हुनेछ।
प्रकाशित मिति: २०२४-१२-०९ , समय : १६:५९:२४ , २ हप्ता अगाडि