ईनेपालपत्र , २८९ पटक हेरिएको
काठमान्डौ ,१२ भदौ। भनिन्छ, धन हुनेको मन हुँदैन र मन हुनेसँग धन हुँदैन । अर्थात्, धन र मन दुवै भएका मानव पाउन मुस्किल पर्छ । त्यस्तै बिरलाकोटीमा पर्छन्, डा. सुनील शर्मा ।विराटनगर, काठमाडौँ र कोहलपुरमा गरी तीनवटा मेडिकल कलेज तथा अस्पतालहरुका सञ्चालक डा. शर्मा व्यावसयिक रूपमा जति सफल हुँदै गएका छन्, समाज सेवामा उनको योगदान र मनकारी व्यक्तित्वको चर्चा पनि उत्तिकै बढ्दै गएको छ ।
मोरङमा मात्र वर्षमा करोडौँ रुपैयाँबराबरको निःशुल्क स्वास्थ्य सेवा नोबेल मेडिकल कलेजले दिइरहेको छ । ग्रामीण क्षेत्रका विपन्न बिरामीलाई लक्षित गरी नोबेलले प्रदेश–१ का बस्तीबस्तीमा पुगेर नियमित निःशुल्क स्वास्थ्य शिविर सञ्चालन गर्दै आएको छ । नोबेलले तराईका भित्री गाउँदेखि हिमाली जिल्लाका विकट ठाउँमा समेत स्वास्थ्यशिविर सञ्चालन गरेको छ ।
गत वर्ष मात्रै शिविर र अस्पतालबाट नोबेलले साढे १३ सयभन्दा बढी बिरामीको निःशुल्क उपचार गरेको छ । अस्पतालमै आएका ५५ हजार बिरामीलाई २० करोड ८४ लाख ७१ हजार ९ सय ९० मूल्यबराबरको निःशुल्क सेवा दिएको छ । नोबेलले विपन्न नागरिक औषधि उपचार कोष, आमा सुरक्षा कार्यक्रम र स्वास्थ्य बीमामार्फत् पनि बिरामीलाई सहुलियतमा उपचार गर्दै आएको छ । कतिपय सरकारका यस्ता कार्यक्रमलाई सफल बनाउनसमेत यस संस्थाको भूमिका उल्लेखनीय छ ।
शर्माले आफ्नै लगानीमा सतार, चमार, डुम, झागड, मुसहरजस्ता जातिका ३ सयभन्दा बढी विद्यार्थीलाई निःशुल्क चिकित्सा शिक्षा पढाएका छन् । नेपालमै पहिलोपटक सतार समुदायका युवाले एमबीबीएस अध्ययन गरी डाक्टर बन्ने अवसर पनि उनकै पहलमा सम्भव भएको छ ।यस्तै राष्ट्रका गहना मानिने खेलाडीदेखि समाजको सबैभन्दा किनारीकृत सतार समुदायलाई निःशुल्क स्वास्थ्योपचारको जिम्मा लिन सक्ने फराकिलो छाती भएका व्यवसायी पनि डा. शर्मा नै हुन् ।
व्यावसायिक सफलताकै हिसाबले हेर्दा प्रदेश–१ कै प्रतिष्ठा बनेका डा. शर्माले पछिल्लो समय विराटनगरको नोबेल मेडिकल कलेजका अलावा काठमाडौँको केएमसी शिक्षण अस्पताल र कोहलपुरको नेपालगन्ज मेडिकल कलेजको पनि स्वामित्व किनेर सफलतापूर्वक सञ्चालन गरिरहेका छन् । यही कारण पेसाले चिकित्सक भए पनि उनमा कुशल व्यवस्थापकीय क्षमताको पनि चिनारी झल्किन्छ ।
नोबेलमा मात्र एमडी, एमएस, एमबीबीएस, बीडीएस, बीएससी नर्सिङ, स्टाफ नर्स, ल्याब टेक्निसियन, रेडियोग्राफी, डेन्टल हाइजिनिस्ट, डिफार्मलगायत संकायमा करिब १ हजार ६ सय विद्यार्थी अध्ययनरत छन् । स्थापनाको छोटो अवधिमै स्वास्थ्य उपचार र स्वास्थ्य शिक्षाका क्षेत्रमा नोबेल एक प्रदेश–१ भरिकै पहिलो नम्बरको संस्था बन्दै छ ।
डा शर्मा पछिल्लो समय विराटनगर मात्रै नभई प्रदेश–१ भरिकै लागि आशा र भरोसाका केन्द्र बनेका छन् । कसैलाई चोटपटक लागोस् या गम्भीर रोगले नै सताओस्, आर्थिक अवस्था कमजोर छ भने उनी पैसाको मुख हेर्दैनन् । त्यहाँनिर मानवीयता सबैभन्दा पहिला अगाडि आउनुपर्छ भन्ने मान्यता राख्छन् । समाज र राष्ट्रलाई योगदान दिएका तथा उपचार खर्च बेहोर्न नसक्नेहरुका लागि पनि उनी आडभरोसा बनेका छन् ।
डा. शर्मा शिक्षा र स्वास्थ्यको क्षेत्रमा एक अद्वितीय नाम हो । देशका विभिन्न भागमा नोबेलजस्तै उम्दा शैक्षिक एवं स्वास्थ संस्था खोलिदिएर प्रभावकारी सेवा उपलब्ध गराउन उनको माग भइरहेको हुन थालेको छ । पहिला सम्भावना खोज्दै देशका विभिन्न सहरमा पुग्ने शर्मालाई अहिले देशका कुनाकन्धराले खोजिरिहेको छ ।
शर्माले आफ्नै देशमा अन्तर्राष्ट्रियस्तरको चिकित्सा शिक्षा र स्वास्थ्य सेवा दिन ठूलो जोखिम मोलेर लगानी बिस्तार गरिरहेका छन् । चिकित्साका विविध विधामा संसारको अत्याधुनिक प्रविधि र विलक्षणक चिकित्सक भित्र्याएर सेवा उपलब्ध गराइरहेका छन् । नेपाललाई चिकित्सा शिक्षा र स्वास्थ्योपचारको अन्तर्राष्ट्रिय हब एवं गन्तव्य बनाउने मूल ध्येयका साथ उनले काम गरिरहेका छन् । यसैका निम्ति उनी रातोदिन खटिरहेका छन् ।
स्वास्थ्य र शिक्षामा उनको यो लगानी र प्रतिबद्धता हेर्दा लाग्छ– यो देशमा राज्यले गर्नुपर्ने काम उनले गरिरहेका छन् । शिक्षा र स्वास्थ्यमा राज्यले लिनुपर्ने दायित्व उनले आफ्नो काँधमा बोकेका छन् । अर्थात् राज्यको धेरै ठूलो बोझ आफूले उठाइदिएका छन् ।डा. शर्मा आफ्नो सेवाको दायरा अझै फराकिलो बनाउन चाहिरहेका छन् । राज्यका नीति निर्माणमा पनि आफ्नो योग्यता र अनुभवको भरपुर प्रयोग गर्न चाहन्छन् । यही उद्देश्यका साथ डा. शर्मा जनताको सर्वोच्च जनप्रतिनिधिमूलक संस्था प्रतिनिधि सभाको सदस्य बन्ने कसरतमा छन् ।
मोरङ–३ बाट नेपाली कांग्रेस नेतृत्वको पाँच दलीय गठबन्धनका तर्फबाट उम्मेदवार बन्ने लगभग निश्चित देखिएको छ । चुनावमा यस गठबन्धनबाट उठ्न लागेका भए पनि उनलाई सबै राजनीतिक दल, सामाजिक तथा पेसागत संघसंस्था र स्थानीय युवा क्लबसम्मले उत्तिकै रूचाउँछन् । उनले आफ्नो पेसा व्यवसायका माध्यमबाट सबै तह र तप्कालाई उत्तिकै गुन लगाएका छन् । अझ डा शर्माको सफल व्यावसायिक छवि र सामाजिक सेवाको प्रभावकारण मोरङ–३ का बासिन्दाले यसपालि जसरी पनि सांसद बनेको हेर्न चाहेका छन् । उनीहरुले नै माग गरिरहेका छन् ।
अघिल्लो चुनावमा पनि शर्मा यही क्षेत्रबाट उम्मेदवार थिए । एमालेका भानुभक्त ढकालसँग झीनो मतले उनी पछि रहेका थिए । त्यतिखेर एमाले र माओवादीको गठबन्धन थियो । यसपालि एमाले एक्लै मैदानमा छ । त्यस्तै पार्टी फुटेको अवस्था छ । उनका त्यसबेलाका प्रतिस्पर्धी ढकाल स्वास्थ्यमन्त्री हुँदा विभिन्न प्रकरणमा विवादित भएको र आफू जितेको क्षेत्रका लागि केही पनि उल्लेख्य योगदान गर्न नसकेको कारण प्रत्यक्ष चुनाव लड्नका लागि आँट गर्नै मुस्किल छ । त्यसमाथि एमाले आफै विभाजित भएको कारण पनि यसपालि जो उठे पनि शर्मालाई चुनौती दिन निकै कठिन छ ।
डा शर्मालाई आफ्नो गुजाराका लागि सरकारी तलब कुरिरहनुपर्दैन । गाडी चढ्नका लागि अरु कुनै बजेटमा भ्रष्टाचार वा कमिसन खानुपर्दैन । बरु उल्टै उनले आफ्नो कमाइबाट समाज र देशको सेवा गरिरहेका छन् । अहिले देशभरि एउटा माहोल के बनेको छ भने राजनीतिलाई निर्वाहमुखी पेसा बनाउनेहरुलाई विस्थापित गर्नुपर्ने अभियानै चलेको छ । अझ राजनीतिलाई गोरखधन्दा बनाउनेहरुको त नामसूची नै बाँडिँदै छ । समाज र राष्ट्रका लागि विभिन्न आआफ्नो पेसागत क्षेत्रबाट योगदान गरेर चिनिएका व्यक्तिहरुलाई यसपालि चुनावमा छान्नुपर्ने मत जबरजस्त बन्दै छ । यस अभियानले पनि चिकित्सक एवं शिक्षासेवी डा. शर्मालाई जिताउन मतदातालाई अभिप्रेरित गर्ने देखिन्छ ।
प्रकाशित मिति: २०२२-०८-२८ , समय : १९:०६:३५ , २ वर्ष अगाडि